Ergaa Gulaalaa (Editors Note)

Baatii sadan darban tokko keessa dubbisaan Burqaa tokko haala maxxnasaa barrulee kanaa fi qabiyyee inni qabatee ba’aa turee fi jiru ilaalchisee xalayaa nuuf barresseen yaada qeeqqaa fi waan akka sirraa’u jedhee ilaalcha qabu akka armaan gadii kanatti nuuf barreesse. Yaadni akkasii yeroo nuuf barreeffamu isa jalqabaa ta’uu baatellee, deebiin kan ifatti kennamuufii qabu ta’ee waan nutti mul’ateef ijoo dubbii keenya har’aaf filane. Ijoon dubbii xalayichaas akkas kan jedhu ture.

“...Yaa qopheessitoota Burqaa! Akkuman olitti jedhe, barrulee isin qopheessaa jirtan kun yeroo ammaa kanatti barrulee tokkicha afaan Oromoon ba’aa jiru ta’uu isaa caalaayyuu, qabiyyee barruleen kun qabatee ba’aa jiru, kanneen keessaa; eenyu turan mata duree jedhu jalatti waa’ee, gootota Oromoo kanaan dura darbanii, kutaa Gola kitaabotaa keessatti, xiinxallii fi gaaffii isin dhiheessitan, akkasumas ilaalcha mata duree jedhu jalatti ijoo dubbii isin kaastan kanneen an itti gammaduu fi isin jajjabeessuu barbadu keessa hanga tokko. Haa ta’uyyuu malee yeroo hunda ilaalcha dhaaba tokkoo fi namoota murtaa’ee qofa dhiheessuun keessan ammo hangam bilisa taatanii hojii gaazexeessummaa hojjettu isa jedhuuf madaalarra isin keessisa. Dhugaa hojii Oromoo hojjettu yoo ta’eef, hog-dammaqiinsa siyaas taliig ummata keenyaaf hojjechuuf murattanii kan kaatan yoo ta’eef, ilaalcha gar-tokkee, hidhannaa hogganoota ABO ammaa qofaarratti xiyyafattanii hojjettan dhiisaatii Oromoota hunda utuu ilaalcha siyaasaan gar gar hin qoodin wal qixxummaatti keessumsiisuu yaalaa. Nuti Oromoonni Oromummaa keenyaa fi hawwii bilisummaaf qabnuun irra guddaan keenya yaada wal fakkaatu qabaannellee, akkaataa Bilisummaan kun itti dhufuu danda’u irratti ammo ilaalcha adda addaa qabna. Obbo Galaasaa Dilboo kaleessa yeroo Hoggana ABO turee fi har’a haalli inni itti jiru baayyee garaagara. Obbo Abbiyyuu Galataafaan kaleessa akka itti yaadaa turanii fi har’a keessa jiran waan adda addaa akka ta’ellee ilaalla…Maaf namoota akkasiifaaf carraa laattanii yaada isaanii akka ibsataniif hin goone? Egaa maqaa namoota lamaan kanaa kanin dheheef akka fakkeenyaatti malee namoonni yaada ABO irra adda ta’an baayyeen jiraachuun isaanii dagadheen miti….”

Jechuun yaada bal’aa nuuf erge. Nus qopheessitootni Burqaa yaada, gaaffii fi qeeqa nutti dhihaate kana akka yaadaatti fudhannellee, qeeqni nurratti dhihaate garuu akka malee ta’uu isaa hubanna. Sababni isaas nuti yeroo barrulee kana bu’ureessuuf kaane, ejjennoo nuti fudhannee kaane, Barruleen kun waltajjii Oromoonni ugguraa fi gulaalama malee kalaltiin yaada isaanii irratti wal dabarsatan akka ta’uuf. Kanaafuu barruleen kun barrulee namoonni muraasni afaan Oromoo guddisuuf, seenaa keenya irratti wal yaadachiisuu fi odeessii jiru irratti wal jijjiiruuf yaadanii bu’ureessan malee kan dhaaba kamittuu hirkatee dhaaba kamuu miidhuuf, ykn ilaalcha tokko ol qabee kan gad qabuuf kan dhaabbate miti.

Obbo Galaasaa Dilboos haa ta’u Obbo Abiyyuu Galataa, akkasumas namoota kaanis barrulee kana irratti afeerree yaada, muxxannoo fi beekumsa isaanii akka nuuf hiraniif yeroo adda addaatti yaalii gochaa tureerra, afeerraan keenya dhageettii argatee milkaa’uu baatell. Akkasumas namoota waa’ee qabsoo bilisummaa Oromoo irratti hojjetanii fi ilaalchaan garuu ABO irraa adda ta’an, akkasumas hayyoota Oromoo muxxannoo fi dandeettii adda addaa qaban baayyees wal tajjii kana irratti afeerree akka isaan yaadaa fi beekumsa isaanii nuuf hiraniif gaafachaa turreerra. Haa ta’uyyuu malee namoonni keenya tokko tokko waltajii irratti ba’anii yaada ofii ibsachuuf muxxannoo dhabiinsa haa ta’u, hojii nuti hojjennu kana ilaalcha itti kennuu dhabuu ykn tuffachuurraan haa ta’uu…sababa nuti hin beekneen tole jedhanii yaada isaanii nuuf gumaachuuf fedha hin godhatan. Dhiheenyuma kanallee maqaa qoheessitoota walgahii “Tumsa kaayyoo Bilisummaa
Oromiyaa Yeroof dhaabbatee” Jedhuun Washington DCtti qopheessan, waa’ee walgii kanaan walqabatee gaaffii nuti dhiheessineefiif deebii nu dhorkachuun isaanii fakkeenya guddaa tokko nuuf ta’a. Kanaafuu dubbistootni Burqaa martinuu haala akkasii kana akkasitti akka nuuf hubattan barbaanna.

Dhuma irrattis hog-dammaqiinsa hawwaasa keenyaa ol kaasuufis ta’e, seenaa darbe wal yaadachiisuun, deemsa keenya har’aa keessatti garaagarummaa ilaalchaa xixiqqaa qabnu gar tokkotti qabannee, akkasumas hawwaasa cimaa fi abdachiisaa horachuu fi hog barruun afaan Oromoo akka guddatu gochuuf geheen hayyoonni keenya bahuu qaban xiqaa waan hin taaneef, hayyoonni keenya isa kana hubatanii hojii nuti hojjennutti hirmaatanii akka nu cinaa dhaabbataniif carraa kanaan yaamicha dabarsinaaf.

Back